Pekin Yay Olimpiya Oyunlarında Azərbaycan 44 idmançı ilə ağırlıqqaldırma, atçılıq, atıcılıq, atletika, bədii gimnastika, boks, cüdo, güləş, taekvondo və üzgüçülük idman növlərində təmsil olunub. Açılış mərasimində ölkəmizin bayrağını Afina-2004-ün qalibi Fərid Mansurov daşıyıb. 

Cüdo üzrə 73 kq çəki dərəcəsində çıxış edən idmançımız Elnur Məmmədli ardıcıl Belçika, Belarus, KXDR, İran, finalda isə Koreya təmsilçisinə tam üstünlüklə qalib gələrək Olimpiadanın qızıl medalını boynundan asıb. 55 kq çəkidə yarışan yunan-Roma güləşçimiz Rövşən Bayramov yalnız finalda uduzaraq Olimpiya Oyunlarının gümüş medalı ilə kifayətlənib.

57 kq çəki dərəcəsində boksçu Şahin İmranov, 100 kq-dək çəkidə mübarizə aparan cüdoçu Mövlud Mirəliyev, 90 kq çəki dərəcəsində sərbəst güləşçi Xetaq Qazyumov, qadın güləşində Mariya Stadnik (48 kq) isə Pekin Olimpiadasının bürünc medalına yiyələnib. Vitali Rəhimov 2016-cı ildə dopinqə görə BOK tərəfindən Olimpiya medalından məhrum edilib.

Beləliklə, Azərbaycan idmançıları Pekində 7 medal (1 qızıl, 2 gümüş, 4 bürünc) qazanıblar. Ölkəmiz medalların keyfiyyətinə görə 39-cu, kəmiyyətinə görə isə 27-ci yeri tutub.