Ənənəvi olaraq hər il keçirilən “Baku open” beynəlxalq karate turniri bu dəfə dünya şöhrətli idmançımız Rafael Ağayevin 35 illiyinə həsr olunub. Mərasimdə çıxış edən Milli Olimpiya Komitəsinin vitse-prezidenti Çingiz Hüseynzadə karatenin Azərbaycanda populyar idman növlərindən biri olduğunu vurğulayıb. Milli Olimpiya Komitəsinin vitse-prezidenti Çingiz Hüseynzadə karateçilərimiz Rafael Ağayev və İrina Zaretskanın “Tokio-2020” Yay Olimpiyadasında böyük naliyətlər əldə edəcəklərinə inandığını bildirib. Milli Karate Federasiyasının prezidenti Yaşar Bəşirov Azərbaycanda bütün idman növlərinə, o cümlədən karatenin inkişafına dövlət tərəfindən diqqət və qayğı göstərildiyini bildirib. O, bu qayğıya cavab olaraq Azərbaycan karateçilərinin böyük uğurlar əldə etdiyini diqqətə çatdırıb. Tədbirdə Rafael Ağayev, İrina Zaretska və digərləri çıxış edərək Azərbaycanda idman və Olimpiya hərəkatının inkişafına verilən dövlət dəstəyini qeyd ediblər.