Gənclər və İdman Nazirliyinin, Azərbaycan Atletika Federasiyasının və "Bakı Şəhər Halqası" Əməliyyat şirkətinin birgə təşkil etdiyi Xankəndi - Bakı ultra marafonunun ilk mərhələsinə yekun vurulub. Səhər saatlarında Xankəndi şəhərində start götürən ultra marafonun ilk günü Yevlax şəhərində yekunlaşıb. 

“Qürurla irəli” şüarı ilə ilk dəfə keçirilən yarışın birinci mərhələsində  marafon iştirakçıları 83 km məsafə qət ediblər.

Birinci mərhələnin qalibi Elmir Əskərov olub. O, 83 km məsafəni 6 saat 52 dəqiqəyə qət edib. Ağa Əliyev və Elman Abışov isə müfaviq olaraq, ikinci, üçüncü yeri tutublar. Marafon iştirakçıları yarışın növbəti günlərində  Yevlax - Ucar (84 km), Ucar - Hacıqabul (88 km), Hacıqabul - Qobustan (70 km) və Qobustan - Bakı (55 km) mərhələlərini keçməklə, martın 4-də Bakıya çatacaqlar.

Ultra marafonda ümumilikdə 64 idmançı mübarizə aparır. Onlar arasında Türkiyə (5 nəfər), Meksika (4) və Moldova (1) təmsilçiləri də var.