Oktyabrın 6-7-də Türkiyənin İstanbul şəhərində Avropa Olimpiya Komitəsinin 52-ci Baş Assambleyasının iclası keçiriləcək. Türkiyə MOK-un prezidenti Uğur Erdener, AOK-un prezidenti Spiros Kapralos, BOK-un prezidenti Tomas Baxın iştirak edəcəyi iclasın ilk günündə “Paris–2024” Yay Olimpiya Oyunları, “Milano Kartina-2026” Qış Olimpiya Oyunları müzakirə olunacaq. Əlavə olaraq AOK-un Strategiya Gündəliyi 2030 iştirakçılara təqdim olunacaq. Həmçinin AOK Təşkilat Komitəsinin və BOK Təşkilat Komitəsinin hesabatları dinləniləcək. Daha sonra 12-ci Pyotr Nurovski Ən yaxşı Avropalı Gənc Atlet mükafatının və Avropa Olimpiya Komitəsinin Olimpiya Çələngi Mükafatlandırılma mərasimi keçiriləcək.

Beynəlxalq Olimpiya Komitəsinin prezidenti, cənab Tomas Baxın açılış nitqiylə başlayacaq Assambleyanın ikinci günündə 3-cü Avropa Oyunları Krakov & Malopolska 2023, məlumat və media, Avropa federasiyalarının və MOK-larının Təcrübələri və Gələcək Tövsiyələri, qarşıdan gələn Paris-2024 Yay Olimpiya Oyunları, Olimpiya Qaçqınlar Fondu, Olimpiya və Paralimpiya Sponsorları, Tibb və Antidopinq kimi mövzular ətrafında fikir mübadiləsi aparılacaqdır.

Azərbaycan Respublikası Milli Olimpiya Komitəsinin vitse-prezidenti Çingiz Hüseynzadə, Baş katib Azər Əliyev, Xarici Əlaqələr İdarəsinin müdiri Anar Bağırov da AOK-un 52–ci Baş Assambleyasının iclasında iştirak edəcəklər. 
 

Baş Assambleyanın iştirakçılarına AOK prezidenti Spiros Kapralos, AOK Baş katibi Rafael Paqnozi tərəfindən hesabatlar da təqdim olunacaq. AOK-un 2022-ci il maliyyə hesabatı, 2024-cü ilin büdcəsi, xarici auditorların təyinatı və AOK komissiyalarının hesabatları da iclasın gündəliyinə salınıb.

Milli Olimpiya Komitəsinin mətbuat xidməti