Azərbaycan Güləş Federasiyası (AGF) Sabirabadda seminar keçirib.

AGF-dən verilən məlumata görə, Olimpiya İdman Kompleksində təşkil edilən tədbirdə Sabirabad, İmişli və Saatlı rayonlarında çalışan güləş məşqçiləri iştirak edib.

Seminarın nəzəri hissəsinin açılışını edən Mil-Muğan Regional Gənclər və İdman İdarəsinin idman şöbəsinin müdiri Vüqar Kərimov milli komandalarda çalışan təcrübəli mütəxəssislərin bu tədbirdə iştirakının məşqçilərin bilik və bacarığının təkmilləşdirilməsində böyük rol oynadığını bildirib.

Hakimlər Kollegiyasının sədri Qərib Əliyev yerlərdə maddi-texniki bazanın və infrastrukturun yaxşılaşdırılması istiqamətində atılmış addımlardan və güləş qaydalarından danışıb.

Sərbəst güləş üzrə U-17 millinin məşqçisi Əsgərxan Novruzov Mərdəkan qəsəbəsində yerləşən gimnaziyada açılmış güləş bölməsinin fəaliyyətinə diqqət ayırıb və bu bölgədən olan perspektivli yeniyetmələrin də həmin təhsil ocağına cəlb edilə biləcəyini vurğulayıb. Yunan-Roma güləşi üzrə U-20 millinin məşqçisi Zöhrab Abbasov yeniyetmə güləşçilərin normadan artıq çəki salmasının onların inkişafını əngəllədiyini və yuxarı yaş qruplarına keçid zamanı uğur qazanmaqda çətinlik çəkdiklərini dilə gətirib. I-S kateqoriyalı referi Sədi Quliyev isə video görüntülərin nümayişi fonunda mübahisəli epizodları şərh edib.

Seminarın praktiki hissəsində milli komandaların məşqçiləri nümunəvi məşq keçiblər. Onlar sərbəst və yunan-Roma güləşi üzrə müxtəlif fəndlərin icrasını, hücum və müdafiə yollarını göstəriblər.

Qeyd edək ki, güləş məşqçilərinin Ümumrespublika seminarının son mərhələsi dekabrın 10-da Bakıda keçiriləcək.