Martın 11-də Qış İdman Növləri Federasiyasının prezidenti Fuad Nağıyev Azərbaycanı fiqurlu konkisürmə üzrə beynəlxalq yarışlarda təmsil edən idmançılarımız Yekaterina Ryabova və Vladimir Litvintsev ilə görüşüb.
Görüş çərçivəsində Fuad Nağıyev idmançılarımızın 21-27 mart tarixlərində Fransanın Monpelye şəhərində keçiriləcək Fiqurlu Konkisürmə üzrə Dünya Çempionatına hazırlıqları ilə maraqlanıb, onlara öz tövsiyyələrini verib, uğurlar arzulayıb. Fuad Nağıyev federasiyanın gələcək fəaliyyət planları haqqında danışaraq gələcəkdə də atletləri dəstəkləməyə hər zaman hazır olduqlarını bildirib.

Qeyd edək ki, Fiqurlu Konkisürmə üzrə Dünya Çempionatında Azərbaycan 4 idmançı- Vladimir Litvintsev, Yekaterina Ryabova, həmçinin buz üstündə rəqs üzrə Yekaterina Kuznetsova və Aleksandr Kolosovskiy ilə təmsil olunacaq.