İsveçin “Dagens Nyheter” qəzeti Bakıda keçiriləcək Azərbaycan-İsveç matçı ərəfəsində əfsanəvi azərbaycanlı arbitr Tofiq Bəhramova məqalə həsr edib. O, xüsusilə 1966-cı ildə futbol üzrə dünya çempionatının İngiltərə ilə Qərbi Almaniya arasındakı final oyununda mübahisəli qolu britaniyalıların xeyrinə saymaq qərarı ilə tarixə düşüb. Oyun “Wembley Stadium”da keçirilmişdi.

Topun qapı xəttini keçib-keçməməsi barədə mübahisələr və debatlar uzun müddət davam edib. Lakin 2016-cı ildə Britaniyanın “Sky Sports” şirkəti Tofiq Bəhramovu dəstəkləyib. Şirkət müasir texnologiyaların köməyi ilə sübut edib ki, top həqiqətən də qapı xəttinin arxasında olub.

Almanlar bu qərardan qəzəblənmişdilər və heç vaxt hesaba alınmayacaq olan qol üçün “Wembley-Tor” terminini fikirləşdilər.

“Mənim atam düzgün qərar qəbul etməsi barədə fikrində möhkəm idi. Əlbəttə, bu, olduqca mübahisəli qol idi. Lakin o, əmin idi və kiminsə ona təsir etməsinə imkan vermirdi”, - deyə futbol əfsanəsinin oğlu Bəhram “fifa.com” saytına müsahibəsində bildirib.

Xatırladaq ki, futbol üzrə Azərbaycan yığması cümə axşamı – noyabrın 16-da Avropa-2024 çempionatının seçmə turnirinin cavab matçında İsveç yığması ilə qarşılaşacaq. Oyun Tofiq Bəhramov adına Respublika Stadionunda keçiriləcək.