Azərbaycan Kanoe və Avarçəkmə Federasiyasının (AKAF) təşkilatçılığı ilə ilk dəfə ölkəmizdə konsept trenajorda yarış keçirilib.

AKAF-dan verilən məlumata görə, akademik avarçəkmə növündə təşkil edilən federasiya birinciliyində 30 nəfərdən çox idmançı gücünü yoxlayıb. Kişilər arasında əsas yığmanın mübarizəsində Bəhmən Nəsiri yarışın ümumi ən yaxşı nəticəsini göstərib. Nəsiri 2000 metr şərti məsafəni 5.49.9 dəqiqəyə başa vurmaqla həm də dünya konsept yarışlarında ən yaxşılar sırasında yer alıb. Belə ki, sonuncu dünya çempionatının nəticələri ilə müqayisədə Bəhmən Nəsirinin nəticəsi 4-cü olub. Federasiya birinciliyində eyni kateqoriyada çıxış edən Murad Sadıxov ikinci, Ziya Məmmədzadə üçüncü olub.

1000 metr məsafədə 2007-2010-cu il təvəllüdlü oğlanlar arasında Məhəmməd Həsənov birinci, Sabit Abdullayev ikinci, Ümid Abbaszadə 3-cü yeri tutub.

500 metr məsafədə 2010-2013-cü il təvəllüdlü oğlanların mübarizəsində Ruslan Fərəcov bütün rəqiblərini üstələyib. Şamil Şəfizadə ikinci, Yusif Əliyev üçüncü yerə layiq görülüb.

2007-2010-cü il təvəllüdlü qızlar arasında 500 metr məsafəyə mübarizədə Valeriya Vaskovska fəxri kürsünün ilk pilləsinə qalxıb. Sara Mirzəyeva ikinci, Fatimə Məhərrəmli isə üçüncü olub.

Qalib idmançılar Azərbaycan Kanoe və Avarçəkmə Federasiyası tərəfindən diplomla mükafatlandırılıb.