2026-cı ildə İtaliyada keçiriləcək Qış Olimpiya Oyunlarının məşəli alovlandırılıb.

Tədbir Yunanıstandakı Qədim Olimpiya Arxeologiya Muzeyində baş tutub.

Olimpiya məşəlinin alovlandırılması mərasimində Yunanıstan Prezidenti Konstantinos Tasulas, Beynəlxalq Olimpiya Komitəsinin Prezidenti Kirsti Koventri və digər rəsmi şəxslər də iştirak ediblər.

“Keçmiş və bu gün həqiqətən bir araya gəlir. Bu günkü mərasim bizə Olimpiya Oyunlarının nəyə xidmət etdiyini xatırladır: insanları sülh içində yarışmada, dostluqda və hörmətdə birləşdirməyə.” — deyə Beynəlxalq Olimpiya Komitəsinin prezidenti Kirsti Koventri qeyd edib və Olimpiya məşəlinin yandırılmasına işarə verib.

BOK-un prezidenti çıxışına əlavə edərək bildirib ki, Olimpiya alovunu yandırarkən, bu işığı qədim keçmişimizdən ortaq gələcəyimizə daşıyırıq.

Pis hava şəraiti səbəbindən tədbir Qədim Olimpiya stadionundan Arxeologiya Muzeyinə köçürülmüşdü.

Qeyd edək ki, Qış Olimpiya Oyunları fevralın 6-dan 22-dək təşkil olunacaq.