ABŞ-ın Nyu-York şəhərində 28 May – Müstəqillik Günü münasibətilə həmvətənlərimizdən ibarət həvəskar komandaların yarışdığı "Nyu-York-Bruklin" voleybol çempionatı keçirilib.

Amerika-Azərbaycan Gənclər və İdman Assosiasiyasının təşkilatçılığı və Azərbaycanın Diasporla İş üzrə Dövlət Komitəsinin dəstəyi ilə baş tutan idman yarışında beş komanda (Nyu Cersi, Nyu-York, Pensilvaniya, Nyu-York- Bruklin və Boston) iştirak edib. 

Gərgin mübarizə şəraitində keçən yarışda "Nyu-York-Bruklin" komandası çempion adını qazanıb. Çempion komandaya diplom və hədiyyələr təqdim olunub.

Bu cür idman tədbirlərinin əhəmiyyətindən danışan Assosiasiyanın sədri Elgün Xanoğlanlı xalqımızın şərəfli müstəqillik tarixindən və qədim dövlətçilik ənənəsindən də bəhs edib. O, Amerikada yaşayan azərbaycanlı gənclərin müxtəlif peşə sahələrində, eləcə də idmanda ölkəmizi layiqincə təmsil etdiklərini deyib. E. Xanoğlanlı rəhbərlik etdiyi assosiasiya tərəfindən təşkil olunan idman yarışlarının yerli ictimaiyyətin diqqətini çəkdiyini və bu görüşlərin mütəmadi keçiriləcəyini bildirib.

Görüşdə iştirak edən idmançılar öz güclərini ipdartma yarışında da sınayıblar.