"Yarışı bir qızıl və iki gümüş medalla başa vurdum". 

Bu sözləri "Prezident Kuboku-2025" beynəlxalq reqatasının sonuncu yarış günündə qızıl medal qazanan Əlimurad Hacızadə jurnalistlərə müsahibəsində deyib. 

Birnəfərlik kayak qayığında (K-1) 1000 metr məsafəyə yürüşdə 2009-2010-cu illər təvəllüdlü idmançılar arasında fəxri kürsünün ən yüksək pilləsinə qalxan idmançımız növbəti hədəfləri barədə də açıqlama verib.  

"Rəqiblərim hər il qarşılaşdığım idmançılar idi. Ötən illərlə müqayisədə daha soyuqqanlı olmağa çalışdım və bunu bacardım. Üç gün davam edən bu yarışların hər günündə medal qazandım.
Hazırda bizi Slovakiya reqatası və III MDB Oyunları gözləyir. Çalışacağam ki, qarşıdakı yarışlarda da uğurla çıxış edərək ümidləri doğruldum", - deyə Əlimurad Hacızadə bildirib. 

Qeyd edək ki, Azərbaycan avarçəkənləri "Prezident Kuboku-2025" beynəlxalq reqatasını 15 (1 qızıl, 7 gümüş və 7 bürünc) medalla başa vurublar.