Skopye-2025: Azərbaycana ilk qızıl medalı Rza Xəlilli qazandırdı

22 iyul 2025 - 19:43 654

Azərbaycan komandası XVIII Avropa Gənclər Yay Olimpiya Festivalında ilk qızıl medalını qazanıb.

Milli Olimpiya Komitəsinin mətbuat xidməti xəbər verir ki, komandamızın ilk medalçısı -50 kq çəki dərəcəsində mübarizə aparan Rza Xəlilli olub.

Mübarizəyə 1/8 finaldan başlayan cüdoçumuz əvvəlcə Angel Radevskini (Şimali Makedoniya) mübarizədən kənarlaşdırıb. Növbəti mərhələlərdə macarıstanlı Milan Szabo və böyük britaniyalı Koen Cilbertə qalib gələn idmançımız həlledici görüşə vəsiqə əldə edib.

Finalda ispaniyalı idmançı Alexandro Çiarroniyə də qalib gələn cüdoçumuz fəxri kürsünün ən yüksək pilləsinə qalxıb.

Qeyd edək ki, bu gün daha iki cüdoçumuz Gülşən Hüseynova (-44 kq) və Rəsul Əlizadə (-55 kq) də final görüşünə çıxacaq.