Sablya üzrə qadınlardan ibarət Azərbaycan millisi Yunanıstanın paytaxtı Afina şəhərində keçirilən Dünya Kubokunda doqquzuncu olub.

Yarışda mübarizə aparan Anna Başta, Palina Kaspiaroviç, Səbinə Kərimova və Valeriya Bolşakovadan ibarət kollektiv ən güclü səkkizliyə yüksəlmək uğrunda keçirilən qarşılaşmada Bolqarıstan millisinə 44:45 hesabı ilə uduzub.

Yığma 9-16-cı yerlər uğrunda keçirilən görüşlərdə Meksika (45:39), Yunanıstan (45:34) və Polşa (45:44) sablyaçılarına qalib gəlib.

Qadın sablyaçıların şəxsi yarışında yalnız Palina Kaspiaroviç ən güclü “32-liy”ə kimi irəliləməyi bacarıb.