14-16 yanvar 2022-ci il tarixlərində Azərbaycan Cüdo Federasiyasının Azərbaycan Respublikasının Gənclər və İdman Nazirliyi ilə birgə keçirdiyi U-18 yeniyetmələr arasında Azərbaycan birinciliyi başa çatıb.

Fövqəladə Hallar Nazirliyinin (FHN) Hövsan qəsəbəsində yerləşən İdman Sağlamlıq Mərkəzində keçirilən yarışda 76 rayon və şəhərdən olan klub, cəmiyyət və idman təşkilatlarından gənclər iştirak edib. Nəticələrə əsasən, 25 komanda müxtəlif əyarlı medal qazanıb, onlardan da 13-ü regionları təmsil edib.

Ümumilikdə Azərbaycan birinciliyi üzrə yarışlarda 514 idmançı (439 oğlan, 75 qız) medallar uğrunda mübarizə aparıb. Yarışın son nəticəsinə görə, ümumi komanda hesabında 13 nömrəli İxtisaslaşdırılmış Olimpiya Ehtiyatları Uşaq-Gənclər İdman Məktəbi (Bakı şəhəri) 1-ci yerə, “Neftçi” İdman Klubu 2-ci yerə, 1 nömrəli  Təhsil Respublika İdman Mərkəzi Sumqayıt  isə 3-cü yerə layiq görülərək müvafiq kubok və diplomlarla təltif olunublar. 

Yarışın əsas məqsədi Azərbaycanda cüdonun coğrafiyasını genişləndirmək, yeniyetmələr arasında idmanın kütləvi təbliğinə və təşviqinə nail olmaq, eyni zamanda perspektivli namizədləri yığma komandaya seçmək idi. 
Yarışlara ilk dəfə paytaxt Bakı istisna olmaqla, 34 müxtəlif regiondan olan idmançılar qatılıblar.